( بنت فلسطين )
بنت صغيرة ع الطريق
وقفت عندها دورية
سألوها انتي من وين
ردت وبعين قوية
انا من يافا ومن حيفا
انا من القدس الأبية
من جنين أرض الأحرار
وإذا بدك .. غزاوية
من الخليل ورام الله
من الرملة يا عينية
من طولكرم ومن بيسان
أنا بنت فلسطينية
ثار وكشر هالجبان
وضربها ضربة قوية
وقالها إحنا صحاب الأرض
منوخذها شوية شوية
قامت ومسحت نقطة دم
من خدودها الوردية
ومسحت دمعة من عيونها
وبكلمة كنها سحرية
وقامت تتبسم وقالت
انتو شوية حرامية
تسرقوا ارضنا وميتنا
وحجتكم انها دينية
والأرض إلنا ولجدودنا
لأخوي وإمي وبية
وفي القرآن الأرض إلنا
وكل الكتب السماوية
جيتو وحرفتو التاريخ
ضحكتو ع الناس شوية
شوية خون وباعوا الأرض
بأخلاقهم المادية
جيتو بدبابة ورشاش
بطيارة صاروخية
قنابل غاز وآر بي جيه
ورصاصة مطاطية
قتل وتهديد وتشريد
وقدام العالم .. سلمية
وما بتفرق مين المقتول
صغير .. ختيار .. وصبية
جيتو بجيوشكم كلها
تهدوا بيوتنا المبنية
جيتو للقتل والتدمير
بغريزة حيوانية
وإحنا ما معانا سلاح
غير الحجر وشبرية
وحجر صغير شو رح بيفيد
قدام المدفعية
صبرنا .. وثرنا بوجه الظلم
بأسلحة بدائية
ما استسلمنا وقاومنا
بعملية استشهادية
عندكم خوف من الأطفال
ورهبة مش طبيعية
أما قلوبنا ما بتخاف
وعنا شجاعة إلهية
مصممين تكونوا كيان
وتعملوا دوله قومية
وبالمختصر إحنا منتعرفش
بأي دولة اسرائيلية ....
وطبعا ما عجبه الكلام
طلع طلقة فجائية
طاشت بجنون الأعمى
لقت بقلبها الحنية
وع تراب فلسطين نامت
وكانت نومه أبدية
نامت لكن ما ماتت
عايشة بجنة مرضية
وين ايامك يا خالد
وأمجادنا الإسلامية
وينك يا صلاح الدين
وين النخوة العربية
كلهم تنديد واستنكار
بوسائل إعلامية
فيس وتويتر وإنستجرام
تواصلات اجتماعية
أسود شجعان ورا الشاشة
واصوات عاليه مدوية
كلام وصوت ع الفاضي
وقلام مسمومة ومعمية
اطفال بعمر الورد تموت
وأم بنارها مكوية
لا تبكي يا ام الشهيد
ولادك شمعة مضوية
ويا صهيوني موت بنار
وما بتموت القضية
بلادنا جواتنا بتعيش
وبالأحضان القلبية
ورح منضحي بكل ختيار
وكل من عنده شبوبية
وكل طفل صغير بيحبي
ماشاف النور شوية
زغردي يا ام الشهيد
وخلي الزغرودة قوية
وطول مافينا دم يجري
فلسطين بتضل عربية
(فلسطين بتضل عربية)
( بنت فلسطين )
بقلمي
ℳ مًحًمًوٌدٍ آلَعٌرآبًي ℳ
ليست هناك تعليقات:
إرسال تعليق